AMEA-nın Kataliz və Qeyri-üzvi Kimya İnstitutunun laboratoriya rəhbəri, professor Asif Məmmədov və elmi işçi Elnur Oruclu “Termofiziki xassələr və enerji sistemləri” (THERMAM 2020) adlı beynəlxalq onlayn elmi konfransda iştirak ediblər. Konfransda Asif Məmmədov “Cu-Pb-S sisteminin yüksək temperaturda T-x və P-T-X faza diaqramı”, Elnur Oruclu isə “MnBi₂Te₄-SnBi₂Te₄-Bi₂Te₃ sistemindəki yeni maqnetik topolojı izolyator fazaları” mövzuları ilə onlayn çıxış ediblər və hər iki məruzə maraqla qarşılanıb. Hər iki məruzədə yeni funksional xassəli materialların alınmasının elmi əsaslarının işlənməsi istiqamətində görülən işlərdən danışılıb.

Həmçinin videokonfransda AMEA-nın Kataliz və Qeyri-üzvi Kimya İnstitutunun əməkdaşlarının 8 məruzəsinin təqdimatı da olub.

Qeyd edək ki, konfransın iştirakçılarına sertifikatların verilməsi nəzərdə tutulur.