Gənclər və İdman Nazirliyi və AMEA-nın Gənc Alim və Mütəxəssislər Şurasının (GAMŞ) birgə təşkilatçılığı ilə keçirilən gənclərin innovasiya yay düşərgəsi “Kür” Olimpiya Tədris-İdman Mərkəzində təşkil olunan düşərgədə gerçəkləşib. Düşərgənin proqramına əsasən AMEA-nın elmi müəssisə və təşkilatlarında çalışan gənc alim və mütəxəssislər, eləcə də müxtəlif universitetlərdə təhsil alan tələbələr üçün “Smart şəhər: Dörd əsas texnologiya”, “Elm və təhsildə innovativ texnologiyalar”, “Mexatronika və machine learning”, “Simulyasiya proqramları”, “Müxtəlif sahələrdə innovativ texnologiyaların tətbiqi”, “Robototexnika”, “Alternativ enerji mənbələri”, “Süni intellekt”, “Hədəflərimizə doğru addımlayaq”, “Mənim uğur hekayəm” adlı təlimlər keçirilib. Həmçinin “Brain ring” intellektual-əyləncəli oyunu, üzgüçülük, stolüstü tenis, voleybol yarışları və bədii yaradıcılıq müsabiqələri təşkil edilib.
Düşərgə müddətində 44 günlük Vətən müharibəsinin iştirakçıları gənclərlə görüşü baş tutub. Müharibə iştirakçıları və gənclər arasında səmimi söhbətlər aparılıb, Vətən müharibəsinin unudulmaz təəssüratları xatırlanıb.
Düşərgənin bağlanış mərasimində Gənclər və İdman Nazirliyinin Yaradıcı gənclərlə iş və asudə vaxtın təşkili sektorunun müdiri Kənan Kərimov, AMEA-nın GAMŞ-ın sədri, kimya üzrə fəlsəfə doktoru Elmir Babayev və Mingəçevir şəhər Gənclər və İdman İdarəsinin müdiri Kamal Nəcəfli iştirak ediblər.
Tədbirdə düşərgələrin gənclər üçün önəmindən bəhs edən Elmir Babayev bundan öncə təşkil olunmuş gənc alimlərin yay düşərgəsi və indiki gənclərin innovasiya yay düşərgəsinə ümumilikdə 150-dən çox iştirakçı və təlimçinin qoşulduğunu bildirib. Qeyd edib ki, onların yarıdan çoxunu AMEA-nın gənc alim və mütəxəssisləri təşkil edir.
Daha sonra düşərgə müddətində keçirilmiş müxtəlif intellektual-əyləncəli oyunlar və idman yarışları üzrə qaliblərə sertifikat və hədiyələr təqdim edilib.
Qeyd edək ki, bundan öncə 6-11 avqust tarixlərində Lənkəranda Gənc alimlərin yay düşərgəsi təşkil edilmişdi. Həmçinin, proqrama uyğun olaraq düşərgə iştirakçıları Lənkəran Regional Elmi Mərkəzinə baş çəkərək, burada yetişdirilən müxtəlif çay növləri, sitrus bitkiləri, zəngin meşə genefondu ilə tanış olub, professor Fərman Quliyevin mühazirəsini dinləyiblər.
Hər iki Düşərgədə Kataliz və Qeyri-üzvi Kimya İnstitutunun əməkdaşlarıda iştirak ediblər.
Məlumat üçün qeyd edək ki, 18-23 avqust tarixlərində Gənclər və İdman Nazirliyi və AMEA-nın Gənc Alim və Mütəxəssislər Şurasının birgə təşkilatçılığı ilə gənc mühəndislərin yay düşərgəsi təşkil ediləcək.