Noy 16, 2016 | 12:58 / Yubileylər
Tədbiri giriş sözü ilə açan İnstitutun direktoru akademik Dilqəm Tağıyev bildirdi ki, bu mükafat 2013-cü ildən bu tərəfə hər il nailiyyəti olan gənclərə verilir. Akademik gənclərə göstərilən diqqət və qayğıdan danışdı, belə mükafatın gənclərdə stimul yaratdığını vurğuladı və 2016-cı ildə institut gənclərinin qazandığı nailiyyətləri qeyd etdi. O, bildirdi ki, İnstitutun 80 illik yubileyinə həsr olunmuş Respublika elmi konfransı çərçivəsində dünən “Akademik Murtuza Nağıyev adına mükafat”a iddiaçi olan gənclərin çıxışları dinlənildi. Mükafatın təqdimi ilə bağlı komissiyanın yaradıldığını bildirən Dilqəm Tağıyev institut gənclərindən 7 nəfərin namizədliyinin irəli sürüldüyünü qeyd etdi. Komissiyanın gənclərin çıxışlarını və daxil olan sənədləri mükafatın əsasnaməsinə uyğun araşdıraraq irəli sürülmüş namizədlərin 4- nün fəaliyyətinin yüksək qiymətləndirildiyini bildirdi.
Sonra akademik Dilqəm Tağıyev görkəmli alim, resirkulyasiya nəzəriyyəsinin banısı Murtuza Nağıyev adına mükafata layiq görülən gənc alim və mütəxəssislərin adlarını açıqladı.
Tədbirdə müsabiqənin qalibləri elmi işçi Ülvi Nəcəf-Quliyeva , elmi işçi Natəvan Soltanovaya, elmi işçi Elmir Babayeva və elmi işçi Səadət Hümbətova elmi fəaliyyətdə fərqləndiyinə görə “Akademik Murtuza Nağıyev” adına mükafatın diplomu ilə təltif olundular.
Sonda akademik D.Tağıyev diploma layiq görülən institutun gənc əməkdaşlarını bir daha təbrik edərək, onlara gələcək işlərində müvəffəqiyyətlər arzuladı.